Cайт «Еўрарадыё» 2 чэрвеня быў недасяжны некалькі гадзін пасля чарговай DDoS-атакі.Рэдактар «Еўрарадыё» Яўген Казарцаў у гутарцы з БАЖ зазначыў, што апошнімі тыднямі кібератакі на сайт медыя пачалі здарацца часцей.
«Я б сказаў, прыкладна ад пачатку галасавання на выбарах у Каардынацыйную Раду. Кожны раз яны выкарыстоўваюць розныя шляхі, 2 чэрвеня атака трывала некалькі гадзін, пакуль мы не закрылі тую ўразлівасць сайта, якой яны скарысталіся», — распавёў Яўген Казарцаў.
Паводле журналіста, цяжка адназначна сказаць, ці звязана актыўнасць хакераў з асвятленнем «Еўрарадыё» выбарчай кампаніі ў КР, «але насамрэч з канца красавіка мы заўважылі больш атак, абсалютную большасць якіх адбіваем з Cloudflare».
Як паведамляў БАЖ, на пачатку траўня некалькі буйных беларускіх медыяў заявілі пра DDoS-атакі на свае сайты. 29 красавіка пра кібернапад паведамляла анлайн-выданне «Зеркало» і папярэджвала, што праз гэта часова могуць не адкрывацца старонкі сайта.
Хто ажыццяўляе атакі — невядома.
Раней шэраг сайтаў незалежных медыяў трапіў пад атаку кіберзлачынцаў у сакавіку, на Дзень Волі. Тады пра гэта папярэджвалі беларускія прапагандысцкія рэсурсы.
The full story
This article is one source in a clustered incident — the cluster page carries the summary, timeline and every other outlet covering it.
